БИЛҮҮ

Banksy - 'Love is in the Bin'

Хурц хутганд 

Үрж тэнцэх билүү хэрэгтэй

Элээх жамтай түүнд ч

Ирлэх шалтгаан тулна

Иртэй хүчтэй бүхэнд 

Мохоох зовлон оршино

ҮГҮЙРЭЛ

Yinka Shonibare, FAKE DEATH PICTURE (THE DEATH OF CHATTERTON, HENRY WALLIS), 2011

Утга учиргүйд орооцолдоод

Үнэний тухай бодох тэнхэл алга

Ижилгүй энэ солиорол дунд

Итгэж үг хэлэх эрх чөлөө ч алга

Би-гүй этгээд үгүйрэл

АСУУЛТ ХАРИУЛТ

 

The Red Balloon, Albert Lamorisse, 1956

Амьд байна уу? гэж

Надаас асуулаа,

Үнэндээ, амьгүй мэт байсаар дуусаж мэднэ

Тэгвэл,

Хэзээ бид амьдрах (ялах) юм бэ? гэж

Хачин итгэж дахиад асуулаа,

Нэг үнэнтэй болох цагт

Үнэндээ, бид ялахгүй байж ч мэднэ. 

2021.09.02

A PRIVATE PORTRAIT

Julian Schnabel, Number 1 (Van Gogh, Self-Portrait with Bandaged Ear, Willem), 2018. Oil, plates, and bondo on wood, 72 x 60 inches. © Julian Schnabel.

Чи яагаад түүнд дуртай вэ?

Таниагүй болохоор 

Дуртай эсвэл дургүй ч байх

Гэхдээ чамд мэдрэмж бий

Олон янзын

Маш ойрхон ч гэлээ,

Яг би биш

БОЛДОГ БҮХЭН

We are all fakes, fake Banksy

Болохгүй бүхнийг болгоод

Бүтэхгүй бүхнийг аргалаад

Бүхнийг хулхидаад байтал

Болдог бүхэн байхгүй болчихлоо

ЦЭВЭР БОДОЛ

Tokyo 2020 Olympics opening ceremony

Тэвдэж сандарсан хүн

Тэмцэх л ёстой гэж сэтгэнэ

Гэвч,

Хүнд, хэцүү нь хаана байгааг мэдэх

Харагдахгүй бүхний хүчийг таних

Тэнцвэрээ олоод амьсгаа авах

Тэгээд бодох, гүйцэд бодох хэрэгтэй

Тэмцэхээс урьтан бодох хэрэгтэй

Цэвэр бодол л хэрэгтэй

ҮНЭНИЙ УРСГАЛ

 

"Truth flows through me" by Kim Beller

Тунгалгаас тунгалгийг хүртэхэд

Цэнгэгээс цэнгэгийг амтлахад

Цэврээс цэврийг таашаахад

Үнэнээс үнэн байхгүй бол болохгүй

ӨНЦӨГ

 Andrei Tarkovsky's 'Stalker', 1979

Хайрцагт хийхгүйгээр Хүнтэй л харилц Хэмжээс, хэмжүүрийг өөртөө тавь Тэд өөрийнхөө нүдээр ертөнцийг харж байгаа

Жаргалтай

 TOKYO PARROTS, 

Yoshinori Mizutani, 2013

Суух мөчрөө олоод

Шулганаж байгаа 

Шувууд жаргалтай

Хараад л

.-.. .. ..-. . [life]

Nostalghia (1983)- last scene

Director: Andrei Tarkovsky

Тархиндаа ганц цэцэг тарих гэж

Үгсээр үр суулгасаар одно

Тасралтгүйрүү

SILENT MOOD

The Silent Runner, Nathan Oliveira, 2001

Ёстой бүхэн үгүй болоход

Түшмэд аниргүй уусаж

Эцэсгүй бүтэлгүйтэл л үлдэнэ

(ХАШИЛТ)-Д

DAILY BREAD, Wojciech Siudmak, XX cent.

Бусдын мөрөөдөл дунд

Жимээс гажилгүй сажилж

Дохиураар хөдөлж

Хавтсаар үнэлэгдэж

Гадаадаар ярьж

Шинээ ч олохгүй 

Хуучнаа ч танихгүй

(Хашилт)-д амьдармааргүй байна

ХУЛГАЙЧИЙГ ОЛСОН НЬ

Корней Чуковский, "Хулгайлагдсан нар”-аар зохиомжилсон 1982 онд хэвлэгдсэн  "Үлгэрүүд" номын хавтасны чимэг зураг, Зураач: Ю.Васнецов, А.Каневский, В. Конашевич, В.Сутеев 

Авах гэсээр

Түрүүлж авах гэсээр

Би авахгүй бол чи авахгүй гэсээр

Нарыг залгичихсан юм

Тэгээд харанхуйд суух болсон

Тэвчишгүй бүхэн эхэлсэн

ТААШААЛ

 

Bite 44: René Magritte - Portrait of Edward James, 1937

Мэдрэх гэж 

Сайхныг

Таних гэж

ТААШААХ гэж

Таних гэж

Сайхныг

Мэдрэх гэж

Амьдарсан

 

САЙН АХ

 

Enemy, Kezimir Malevich, 1913

Үг болгоныг нь биелүүлж

Үйлдэл бүхнийг нь дагадаг, ах нар чинь

Үнэндээ, чамайг алахыг л хүсдэг.

ХУЛЖСАН САЛХИ

Death awaiting his family, Yves Tanguy

Тархи, зүрх, цаг гурав зөрж цохисон

Тийм гэхийн эцэсгүй жихүүн байна, энд

Салхи хулжиж, тархи дүрвэж байна.

Сайхан эх орон чинь хаана байна?