АЛБАН ЖУРМЫН НАЙЗ

Аяны шувууд буцахад

Албаны хүмүүс санаашрахаас цаашгүй

Гунигт бодол тээсэн мөртийг

Гурав хоноход хэн ч санахгүй

Өглөө жиргэх шувуудийн уянгыг

Өдрийн нүргээн сарниаж орхино

Үүрдийн мэт даргиа үгсийг

Үүр цайсан хойно хайгаад олохгүй

ЖАРГАЛ СҮҮЛИЙН ЗОГСООЛ БИШ

Яаж ч мэдэх тааварлашгүй хүмүүс
Яагаад ч өөрчлөж чадахааргүй төгс замбраагүйтэл
Жаргалтай болох сүүлийн хүсэлдээ хөтлөгдөх
Зорилготой ба зорилгогүй сонголт
Зовлон болж үржинэ

Жаргал сүүлийн зогсоол биш

ТҮМНИЙ ТАШУУР

Мянган жилийн урдах 
Талын эгшигийг сонсох гэж
Мэлмийгээ хаагаад
Тэнгэр дор захирагдах гэж
Эх орны хүү болсон юм

Шударгыг сарниагч, үнэнийг үрэгч
Түмэнд ноёрхогч, төрөөс хулгайлагч
Нутгаа худалдагч, Монголоо барагчдад  
Ташуур байх гэж 
Эх орны хүү болдог юм

МӨХӨЛ

Бусдад олдоогүй боломжийг 
Бугуйн цаг шиг өмчлөх нь 
Амтат эрх чөлөөний
Амь тавих цэг 

ТЭР ЧИНИЙ ЗАМ БИШ

Тэнцүү буюу ихийн тэмдгийг

Тэмтчиж ядах нь амьдрах биш 

Арван нүүртэй юм шиг хүмүүс 

Амьдарч л байдаг юм

Шударга гэдгийн тоть шиг хэлдэг ч

Шуналдаа дарлуулаад өөрийгөө хороох нь байдаг юм

Сайн хүнд ч муу зүйлс тохиолддог л юм

Муу бүхний төлөөсийг сайн нь дандаа төлдөг юм

Тэнцүү буюу ихийн тэмдгийг

Тэмтчиж ядах нь амьдрах биш 

Тэр чиний зам биш

АЙХ ЮМНЫ ТУХАЙ (ХОЛИО)

Ардад ойр 
Амьдралд ойр 
Үнэнд ойр бай
Зөрчлөөс бүү ай
Айх юмтай бай

АРДАД ОЙР

Л.Бумандорж, "Дэнжийн манга" 

2002 он, 84х200

Салхи салхилах, бороо орох нь нэгэн удаагийнх
Цэцэг ургах нь нэгэн зуных
Амьдрах нь нэгэн насныг
Харин хөрс бол түм түмэн жилийнх

Цэцэгс бөхийж газрыг хүндэтгэх нь салхины  аяс бус
Ноёд бөхийж түмнийг хүндэтгэх нь түүний сайных бус

Угаас цэцэг хөрсний шим
Угаас түшмэд түмний итгэл
Түшсэн хойноо түмнээс урваж хувийг бодоод яах

Ардад ойр 
Амьдралд ойр 
Үнэнд ойр бай

ХУВИРАЛ

Гараараа ярьж
Шилнээс найзыгаа хайсан
Нон стоп солиорол
Лайкийнхаа тоогоор үнэлэгдсэн
Эзэн биегүй, элс шиг хүмүүс
Дахин давтагдах стерео хүслүүд
Мөрөөдлөө савлуулсан
Метаморфозис хувирал

ШИЛТЭЙ ХАЙР

Худалдагчаа! 

Завгүй, ажилтай ч
Зайлшгүй хэрэгцээгээр
Хэрэглэхэд хялбар
Хугацаа нь дуусаагүй
Худлаа сурталчилгаагүй
Хямдхан үнэтэй
Дөмөгхөн чанартай
Шинэхэн савласан 
Шилтэй хайр нэгийг авья! 

БҮГДЭД ТУСТАЙГ БҮТЭЭ

Ярих
Ойлгох 
Хамтрах
Оюундаа эзэн нь байж
Амьдралыг жолоодон авч яв!

Шалгах 
Ярилцах 
Ойлголцох 
Хамтрах
Нийтэд сайн 
Бүгдэд тустайг бүтээ!

TURN OFF

Мөрөөдөхгүй
Итгэхгүй
Хамтрахгүй 
Хайрлахгүй
Мэдлэгт дурлахгүй
Бүтээхгүйгээр 

Худал хэлж
Хувилдаж
Хулгайлж
Хурцаж
Хүчирхийлж бүрэлдсэн
Пластик орон зайд

Баттерей дуусч байна 
Би унтарч байна

БИ СУРАЛЦАНА

Би суралцана
Бусадтай хамтарна
Буурайдаа туслана
Бүхнийг хамгийн сайнаар хийнэ 

Асуулт бүхний ард түмний төлөөх сэтгэл бий
Шийдэл бүхний учигт сайханд тэмүүлсэн итгэл бий 

НАДАД ЗОХИДОГ

Шивнээ бодлыг минь тасдах 

Шиврээ бороонд зогсох нь 

Надад зохидог 

Намрын уйтгар шиг хачин их зохидог

ХООСОН

Хоосныг хараад 
Сайхан гэж бодоод
Салж чадахгүй дурлаад
Бусдад атаархаад
Авч чадахгүй бачуураад
Худал хэлээд
Хулгай хийгээд
Нуух гэж оролдоод
Нүдээ аниад амгаланг хайгаад
Хэн ч мэдээгүй гэж өөртөө итгүүлээд
Алдаж байгаагаа, алсарч байгаагаа мэдэлгүй алхаад
Айдаст өөрийгөө худалдаад
Арай хийж сайхныг олоод
Санаснаараа өмчлөх гэтэл
Угаас хоосон бүхэн сарниж орхив

Дахиад хайх уу?

ЧИНИЙ ЦАГ ХУГАЦАА

Чи дутуу юмгүй бүхэл ертөнц

   Дурсамж, мөрөөдөлтэй амьд ертөнц 

Яагаад бусдын сүүдэрт

Ялихгүй хуулбар болно вэ?

Алив бүхэн өөрөө орон зай

Алдаа, оноотой олонлог ертөнц

Хоосон бүхэнд ч эрчим хадгалагдаж 

Жаргал зовлон зэрэгцэн оршиж, 

              тэмцэлдэн тэлдэг

Чиний цаг бусдынхаас өөрөөр урсаж байгаа

Чи давталт биш

Хүнийх биш, өөрийнхөө цаг хугцаанд амьдар!

ИЧИХ, ИЧМЭЭР ХОЁР

At Tokyo metropolitan art museum 

Бусдаас дутахаас ичнэ
Ичсэнээс нь бусад ичнэ

Хараар цагааныг зурах ичмээр
Хүндлэлгүй, итгэлгүй нь ичмээр

МОДОДЫН НИГҮҮЛСЭЛ

At Gyotoku 

Түмэн би-гийн зовлонг нимгэлж
Интоорийн цэцэг сэмээр хагдарна
Түмний итгэлийг хүндлэж
Интоорийн мод дахин цэцэглэнэ

Аяа, мододын чимээгүй нигүүлсэл

БИ- ЕРТӨНЦ

Ялгамжгүй гэрлийн тэcрэлтээр
Яг энэ амьдрал зурагдсан
Жаргал зовлон тэлж эхэлсэн 
Зоргоороо туучих зан бас эхэлсэн

Би сүүдэр
Би олонлог

ХУВАЛЗ

at Tokyo metropolitan art museum 

Хөөрхий дөө 

Хувалз

Хомхойрч 

Худал хэлж 

Хүчирхийлж

Хуйвалдаж

Хулгайлж

Хөгийн эх ашгийн төлөө

Өөрийгөө худалдаж

Эдлэж гүйцээгүй ямбандаа шигдэнэ

ГОЛ ДҮР

Төгсгөл шиг эхлэл
Худал шиг үнэн 
Зэрэгцэн орших нь 
Зэрэгцэн урсах нь
Төгс эмгэнэх
Том шалтгаан

Хүний зохиолын 
Гол дүр минь

САЙХАН БА ӨНӨӨ ЦАГ

onto Postmodern Birth of venus

Pinned by Eli Faen
www.pinterest.com



Цаг хугацаа бол эдлэл

Шинэ, 
Түүний дараах
Өнөө цагийн 8 үзэмж:

1.
Толь 
Кофе
Шүршүүр
Ном

2.
Сэлфи 
Коллаген
Пластик засал
Сошиал сүлжээ

Сайхныг таашаах хүртэхүй аль эрт балартчихаж
Сайрхах юм биш л дээ, энэ ч

ХҮНИЙ ҮЙЛДВЭР

Мөрөөддөггүй, итгэдэггүй, хайрладаггүй, хамтардаггүй, 
Мэдлэгт дурладаггүй, боловсордоггүй, бүтээдэггүй
Олон төрлийн Монгол хүмүүс
Гадаад барааны шошго наалгаад
Хачин чанаргүй үйлдвэрлэгдэж байна.

Үйлдвэрийн гологдол … хүмүүс
Худал хэлж хуйвалдаж хулгайлж 
Хайран Монголоо 
Хэмлэж идээд дуусч байна.

ШИЛЭН ӨНӨӨДӨР

Photo by Baavgai, 2016
at Tokyo Metropolitan Art Museum 

TWS-NEXT @tobikan "clairvoyance"
Artist:Yusuke Kamara, three, Hiro Hirakawa, Yasoto Masumoto, Soichiro Mihara 

бүтээлүүд

Ирэх, улирах бүхнийг битгий хүлээ
Ирээдүй бас өнгөрсөн гэж үгүй
Өнөөдөр бол мэдрэмжийн цуглуулга
Өнгөтэй бүхнийг шилний цаанаас харж дуу алдахаас өөргүй