Мартагдсан мөрт 2 - ХАМГИЙН ТЭНЭГ МЭДРЭМЖҮҮД БА 7 МОД

Үл мэдэх, түгшүүртэй
Далд дарамттай
Харамлахын зовлон
Сэтгэлийн тавгүйтэл 
Шүлсээ залгимаар
Үс босмоор 
Салж үл чадах мэдрэмжүүд

Чи яагаад ийм эхэмсэг гэж ?
Үл ойлгогдох хүйтэн царай
Үл оошоогдох, төмөр шиг ааш
Эрэлхийлж, сул талыг л харах
Эзэрхийлж, ховх сорох

МАРТАГДСАН МӨРТ 1

Төвөгтэй бодлоо гутлынхаа хээтэй орхиод
Урт гудамжны хэрэлдсэн булангаар эргэлдэж
Будрах цасны ширхэгийг шонгийн гэрэлд тоолмоор
Газраас хөөрмөөр
Татах хүч хэрж зовоох мэдрэмж төрөөд
Алсын гялбаа надаас холдох тусам
Хямдхан дарсны уйт амт амтагдаад
Нүдээ тас анимаар
Бүх биеэр үл үзэгдэх сөрөг эрчим нэвчнэ 

БИ ЮУД СААТНА

Орхигдсон энэ орон зайд
Би юу хийж сууна вэ?
Харах нүдгүйгээр
Сонсох чихгүйгээр
Хайрлахад итгэлгүйгээр
Дотроосоо хөгжих сэтгэлгүйгээр
Өвөгдөө хүндлэлгүйгээр
Өөртөө эзэгнэх эрхэмлэлгүйгээр
Зовлон туулж үнэнийг ололгүйгээр
Сэтгэл хануун амирлалгүйгээр
Өөрийнхөө биш энэ очилд
Би юуд саатна

ГЭРЭЛТЭЙ ХИЙСЭН ҮГГҮЙ ЯРИА

Сэтгэл -Гэгээн гэрлийн чанартай
                Гэнэтийн хир бүү хүрэг

Урд нь би чамайг их гомдоож
Уртаас урт харууслаа тээсээр  чи дахиад ирж
Харамсаад харамсаад барагдахгүй хачин холын нэхэл
Учиг таниагүй явсан урд цагийн явдал

Хийснээ би өөрөө барна
Хэр тэнцүүлэхийг тэнгэр мэднэ
Хойчийн ертөнцөд чамайг олж очоод
Харуусал гунигийг чинь сүүгээр цагаатгана

ШАНАЛАНТАЙ

at OSE market 
photo by Baavgai.Ts










 
Нартай хэрнээ бороотой байна гадаа
Нүргээнтэй хэрнээ гунигтай байна
Бүхнийг мэдэгчдийн хүрээлэнд удаан суухад
Бүх зүйл тодорхой оршоод шаналантай байна

ҮНЭНЧ БАЙ

Үйлдэл бүр нөлөө, үр дагварын тусгал биш 

Үлдээсэн бүхэн минь төгс бас зөв биш

Үсрээд, хувьсаад байгаа бүхэн хөгжил биш

Үүрээд үлдэх ганц өмч - шийдвэр

Өөртөө үнэнч бай

ДАГЗ ШИГ

Тансаг сайхан хүний амьдралд амьдарснаас

Дагз шиг эргүү өөрийнхөөрөө амьдана

Ял төлөвлөж, цааз тулгасан ч

Яасан ч хувирахгүй дагз шиг үхнэ